O ganlyniad i’w tair buddugoliaeth yn eu tair gornest yn y Bencampwriaeth hyd yma, mae Cymru eisoes wedi hawlio’u lle yn y Chwarteri – ond mae King yn mynnu bod perfformiad a chanlyniad proffesiynol arall yn allweddol yn Nantes brynhawn Sadwrn.
Mae’r tîm wedi sgorio 11 o geisiau yn eu tair gêm agoriadol yng Ngrŵp C a byddai pedwaredd buddugoliaeth yn efelychu eu camp yn Siapan bedair blynedd yn ôl, pan enillodd y Cymry eu pedair gêm grŵp.
O wneud hynny, byddai Cymru’n sicr o wynebu Siapan neu Ariannin yn Rownd yr Wyth Olaf.
Dywedodd Alex King: “ Ry’n ni eisiau ennill y gêm a pharhau gyda’r momentwm a’r safonau uchel yr ydym wedi ei greu a’u gosod hyd yma yn Ffrainc.
“Wedi i Georgia ein curo ni yng Nghaerdydd gwta 11 mis yn ôl – ac wedi eu perfformiad campus yn erbyn Ffiji yr wythnos ddiwethaf – ry’n ni’n ymwybodol iawn o’r her sylweddol fydd yn ein wynebu.
“Mae un o’u hyfforddwyr, (Joe Worsley) yn ffrind da i mi ac rwyf am geisio mynd am goffi gydag ef cyn y gêm ddydd Sadwrn.
“Roedd hi’n wych hawlio pum pwynt yn erbyn Awstralia a sicrhau’n lle yn yr Wyth Olaf.
“Roedd hynny’n gam pendant i’r cyfeiriad iawn ond wedi dweud hynny mae’n rhaid i ni orffen y gystadleuaeth yn dda hefyd.”
“Mae cyd-bwysedd ein tîm ar hyn o bryd yn fy mhlesio ac fe amlygwyd hynny yn erbyn Awstralia. Ond mae ambell agwedd o’n chwarae y gallwn gryfhau hefyd.”
Gyda Dan Biggar yn dal i wella o’r anaf i’w frest, Gareth Anscombe fydd yn parhau yn safle’r maswr ar gyfer y gêm yn erbyn Awstralia, wedi iddo hawlio 23 pwynt ar ôl camu o’r fainc yn erbyn y Wallabies.
Eglurodd King: “Mae anaf bychan Dan yn gwella a bydd yn barod ar gyfer y chwarteri ond mae’n rhaid canmol perfformiad Gareth. Roedd camu o’r fainc wedi dim ond naw munud o chwarae a pherfformio fel y gwnaeth yn arbennig.
“Roedd hynny’n profi pa mor allweddol yw’r bechgyn ar y fainc a chryfder y garfan yn gyffredinol.
“Cryfder y garfan hon yw’r 33 sydd yma yn Ffrainc – nid dim ond y 15 sy’n dechrau’r gemau.”
