Mae Undeb Rygbi Cymru wedi penodi Ian Davies yn Rheolwr Perfformiad Elît ar gyfer ei dyfarnwyr.
Mae Davies wedi bod yn y canol dros 100 o weithiau yn y Bencampwriaeth Unedig a chystadlaethau Ewrop ac felly’n dod â môr o brofiad gydag ef i’r swydd.
Dywedodd Huw Bevan, Cyfarwyddwr Perfformiad Undeb Rygbi Cymru: “Rydym yn arbennig o falch o gadarnhau penodiad Ian Davies yn dilyn proses drylwyr oedd yn cynnwys nifer o ymgeiswyr o’r radd flaenaf.
“’Roedd y panel penodi wedi eu plesio’n fawr gydag eglurdeb a gweledigaeth glir Ian am ei syniadau i ddatblygu dyfarnwyr elît yma yng Nghymru.
“Mae gan Undeb Rygbi Cymru hanes balch o ddatblygu dyfarnwyr ar y lefel uchaf un gyda rhai o’n cynrychiolwyr yn cael eu hystyried ymysg y gorau yn hanes y gamp.
“Mae creu rôl fydd yn canolbwyntio’n benodol ar ddyfarnwyr elît yn dangos ein hymrwymiad i barhau i ddatblygu rhai o ddyfarnwyr gorau’r byd.
“Does dim amheuaeth bod gan Ian y profiad perthnasol ar gyfer y swydd ac ‘rwy’n gwybod ei fod yn edrych ymlaen yn eiddgar at fwrw’r maen i’r wal. Mae wedi ymrwymo i adeiladu ar y seiliau cadarn sydd eisoes wedi eu gosod i adnabod, datblygu a chefnogi dyfarnwyr y dyfodol fel y gallent gyrraedd y gemau mawr ar y llwyfan mawr.”
Mae Ian Davies yn eiddgar i barhau gyda gwaith da ei ragflaenydd Paul Adams sydd wedi gweld Amber Stamp-Dunstan, Jenny Davies, Ben Breakspear a Ben Connor yn dechrau gwneud eu marc ar y llwyfan rhyngwladol. Parhau i gryfhau enw da dyfarnwyr Cymru ymhellach ym mhedwar ban y byd fydd un o flaenoriaethau Davies.
Dywedodd Ian Davies: “Mae rhai o enwau chwedlonol y byd dyfarnu dros y blynyddoedd wedi bod yn Gymry – pobl fel Clive Norling, Derek Bevan a Nigel Owens – ac un mlynedd ar hugain yn ôl bu Nigel Williams yn dyfarnu yng Nghwpan y Byd hefyd.
“Ry’n ni nawr yn dechrau gweld ffrwyth llafur gwaith Paul wrth i Ben Breakspear a Ben Connors greu argraff – felly beth am wneud popeth allwn ni i roi’r cyfle iddyn nhw geisio efelychu yr hyn wnaeth Nigel Owens yn ystod ei yrfa.
“Os allwn ni wneud i ddyfarnu apelio at y genhedlaeth iau – fe fyddwn ni’n elwa ar hynny’n sylweddol yn y dyfodol.”
