Dioddefodd John, sy’n 27 oed, yr anaf wrth ymarfer tra bo’r garfan yn paratoi i deithio i Seland Newydd fis nesaf.
Dim ond newydd ddychwelyd i ymarfer yn llawn mae John, sydd wedi ennill 35 o gapiau, wedi iddi frifo ei hysgwydd – olygodd iddi orfod colli dwy gêm olaf Cymru ym Mhencampwriaeth y Chwe Gwlad eleni.
O ganlyniad i’r anaf diweddaraf yma – ni fydd y profiadol John yn chwarae unrhyw ran yn nhair gêm Cymru allan yn Seland Newydd. Bydd ei hadferiad yn cael ei drefnu a’i oruchwylio gan Undeb Rygbi Cymru.
Dywedodd Natalia John: “Mae hyn yn dorcalonnus. Rwyf wedi gweithio mor galed i ddod yn holliach unwaith eto. Mae’n braf bod yn rhan o garfan sy’n paratoi mor dda cyn teithio i Seland Newydd i chwarae’n y WXV.
“Dyma’r math o gemau mawr y mae pawb eisiau bod yn rhan ohonyn nhw ac mae colli’r cyfle i wneud hynny yn ergyd fawr gan i mi, wedi i mi weithio’n galed i gael mynd ar y daith.
“Yn naturiol, rwy’n dymuno’r gorau i’r garfan ond fy mlaenoriaeth i bellach fydd canolbwyntio ar ddod yn holliach mewn da bryd ar gyfer y Chwe Gwlad.”
