Roedd y Gwyddelod ar ei hôl hi ar yr hanner ar ôl i ganolwr Cymru, Robyn Wilkins, lwyddo â dwy gôl gosb i roi ei thîm ar y blaen gyda sgôr o 6-3. Gyda’r holl elfennau yn ffafrio Iwerddon yn yr ail hanner, roedd yn annhebygol y byddai tri phwynt o flaenoriaeth yn ddigon i dîm Rachel Taylor, ac felly y bu.
Llwyddodd cefnwr Iwerddon, Niamh Briggs, a oedd yn dychwelyd ar ôl anaf, â gôl gosb ar ôl 39 munud i ddod â’r sgôr o fewn tri phwynt erbyn hanner amser, a gyda’r gwynt yn rhuo y tu cefn iddynt a’r glaw yn hyrddio i wynebau merched Cymru, roedd y tîm cartref yn ysu am gael dechrau’r ail hanner.
Ar ôl 60 munud o chwarae ffrwydrodd Heather O’Brien o sgrym a hyrddio drosodd i sgorio’r cais tyngedfennol. Chwythodd y gwynt drosiad Briggs yn llydan o’r postyn, ond ymdopodd y Gwyddelod yn wych â’r amodau, gan gadw tîm Cymru yn ddwfn yn ei hanner ei hun.
Roedd amddiffyn dewr y Cymry wedi cadw’r Gwyddelod allan nes yr eiliadau olaf pan welodd y clo Shona Powell Hughes gerdyn melyn am dynnu sgarmes symudol i lawr. Sicrhaodd Briggs y fuddugoliaeth gyda’i thrydedd gôl gosb lwyddiannus o’r noson.
