Ddeng mlynedd ar ôl iddo sgorio ei unig gais dros Gymru yn erbyn Japan, a hynny mewn gyrfa ryngwladol o 72 cap – fe siaradodd Dan Lydiate, Hyfforddwr Cyswllt Amddiffynnol Cymru, gydag Undeb Rygbi Cymru (WRUtv) i rannu ei atgofion am yr eiliad arbennig ac unigryw honno yn ei yrfa: “Yn amlwg, wnes i ddim sgorio llawer o geisiau yn ystod fy ngyrfa ryngwladol,” meddai Lydiate. “Dydw i ddim yn gwybod pam ro’n i’n sefyll mas ar yr asgell i ddweud y gwir. Mae’n rhaid fy mod yn cael hoe fach i fod yn onest!
“Ro’n i bron â phlymio fel asgellwr yn y gornel – ond ro’n i’n ofni y byddwn yn cael fy ngwthio dros yr ystlys ac felly fe wnes i dorri’n ôl i mewn oddi ar fy nhroed dde a llwyddo sgorio. Dwi dal mor falch na wnes i ollwng y bêl!
“Yn naturiol, byddai hi wedi bod yn braf sgorio mwy o geisiau dros Gymru – ond dwi dal wrth fy modd fy mod i wedi llwyddo hawlio’r cais hwnnw a dwi dal yn cofio’r wefr a’r rhyddhad o groesi’r llinell gais y diwrnod hwnnw.”
Roedd un o’i gyd-chwaraewr rhyngwladol, sef George North hefyd yn falch iawn o weld Dan Lydiate yn hawlio’i gais yn erbyn Japan, fel yr eglura Lydiate ei hun.
“Doedd George North ddim yn chwarae y diwrnod hwnnw, ond roedd e’n eistedd wrth ymyl fy ffrind yn y Stadiwm,” meddai Lydiate. “Roedd e’n gwybod nad o’n i wedi sgorio o gwbl yn ystod fy ngyrfa ryngwladol [hyd at y pwynt hwnnw] ac fe ddathlodd yn wyllt yn yr eisteddle.”
Yr Hydref hwn, bydd Cymru’n chwarae Japan yn Stadiwm Principality – y tro hwn ym mhedwaredd rownd y gemau ym Mhencampwriaeth y Cenhedloedd: “Mae Japan wastad yn brwydro tan yr eiliad olaf un,” ychwanegodd Lydiate. “Maen nhw’n dda iawn yn dechnegol, ac mae hi wastad yn frwydr galed rhwng y ddwy wlad.
“Roedd hi’n dda ein gweld yn eu curo’r Hydref diwethaf a does dim amheuaeth y byddan nhw’n cynnig gwir her i ni unwaith eto fis Tachwedd yma. Wedi dweud hynny, ry’n ni gyd yn edrych ymlaen at yr her honno a brwydr gystadleuol iawn arall.”
Peidiwch â cholli’ch cyfle nesaf i weld Cymru’n chwarae Japan gartref ddydd Sadwrn 7 Tachwedd, ym mhedwaredd rownd Pencampwriaeth y Cenhedloedd.
Mae tocynnau ar gyfer holl gemau Pencampwriaeth y Cenhedloedd yr Hydref hwn, gan gynnwys Cymru yn erbyn y Crysau Duon ac Awstralia, ar werth nawr. Mae’n bosib prynu tocynnau am £13.50 yn unig i rai dan 18 oed a £26 i oedolion drwy WRU.WALES/TICKETS.