Ddwy flynedd yn ôl, dechreuodd Llanymddyfri eu hymgyrch gyntaf yn Super Rygbi Cymru fel Pencampwyr Uwch Gynghrair Indigo ym Mharc Pont-y-pŵl, ac fe lwyddon nhw i ennill o 21-18 ar y prynhawn hanesyddol hwnnw.
Bellach mae’r Porthmyn yn Bencampwyr SRC wrth gwrs a thaith i’r Parc enwog yng Ngwent sy’n eu hwynebu unwaith eto’r penwythnos hwn hefyd:
Dywedodd y Prif Hyfforddwr, Euros Evans: “Mae ganddon ni ddechrau anodd iawn i’n hymgyrch wrth i ni fynd i Bont-y-pŵl i ddechrau cyn croesawu Casnewydd aton ni. Erbyn diwedd y tymor dwi’n credu y bydd y ddau dîm hynny ym mhedwar uchaf y tabl – felly mae chwarae yn eu herbyn mor gynnar yn her fawr.
“Y tro diwethaf i ni ennill y Cynghrair, roedden ni’n ofnadwy am chwe wythnos gyntaf y tymor canlynol.
“Ry’n ni wedi siarad llawer am wneud yn siwr nad yw hynny’n digwydd y tro yma a’n bod yn gwneud popeth y gallwn ni i ddechrau’r tymor yn gryf.”
Gorffennodd Pont-y-pŵl ar waelod Super Rygbi Cymru y tymor diwethaf, gan ennill dim ond pedair o’u 18 gêm gynghrair, ond mae Evans yn disgwyl gwelliant mawr ganddyn nhw’r tymor yma:
“Maen nhw’n dîm cytbwys iawn nawr sydd wedi datblygu cryn dipyn yn ddiweddar.
“Fe gollon nhw eu gêm ail gyfle yn erbyn Cwins Caerfyrddin yn yr eiliadau olaf a cholli’n ein herbyn ni yn Rownd Gynderfynol y Cwpan. Maen nhw wedi arwyddo chwaraewyr o wir safon dros yr haf a does gennai ddim amheuaeth y byddan nhw ymhlith y timau fydd ar y brig ar ddiwedd y flwyddyn.
“Rwy’n credu bod Pont-y-pŵl wedi newid eu hagwedd a’u harddull erbyn hyn. Dy’n nhw ddim yn awchu am gaeau trwm – ac mae Tom [Hancock] eisiau iddyn nhw ledu’r bêl ar bob cyfle posib.”
THOMAS YN DAL I FWYNHAU EI GYFRIFOLDEBAU YN ABERTAWE
Roedd gan Abertawe bob hawl i alw eu hunain y tîm a wellodd fwyaf yn Super Rygbi Cymru y tymor diwethaf, er iddyn nhw golli gwasanaeth eu Prif Hyfforddwr Jonathan Thomas wedi dim ond ychydig fisoedd o’r tymor.
Y canolwr Joe Thomas safodd yn y bwlch fel chwaraewr-hyfforddwr, ac mae’n parhau i fwynhau’r ddwy rôl sydd ganddo.
Ar ôl sicrhau lle yn y chwech uchaf ac ennill eu tlws cyntaf ers chwarter canrif, gallai Thomas hawlio tipyn o glod am welliant sylweddol Abertawe’r tymor diwethaf. Fe enillodd ei dîm naw gêm gynghrair – gwelliant sylweddol ar eu hymgyrch y flwyddyn flaenorol.
“Fe gymron ni gam sylweddol ymlaen y llynedd,” meddai Thomas.
“Roedd y flwyddyn flaenorol yn eithaf anodd o ran canlyniadau, ond fe ddangosodd y bechgyn ffydd yn ei gilydd a dod drwyddi. Fe adeiladon ni ar hynny’r tymor diwethaf a gwella popeth oedd o fewn ein gallu.
“Rwy’n credu bod ennill y Plât hefyd yn gadarnhad ein bod ni wedi newid pethau er gwell. Er i ni lithro erbyn diwedd y tymor, mae hynny’n dangos bod yn rhaid perfformio ar yr adegau cywir er mwyn llwyddo’n gyson.
“Fel hyfforddwr, rwy’n dysgu llawer iawn o wersi wrth i mi fynd ymlaen. Er ein bod yn siomedig o golli yn rownd yr wyth olaf yn y Cynghrair yng Nghasnewydd – ar y cyfan ro’n i’n hynod falch o’n gwelliant y tymor diwethaf.”
Yr Erw Lydan yn y Dyfnant oedd cartref Abertawe yn ystod eu hymgyrch ddiwethaf, ond Sain Helen fydd yn cynnal gemau’r Gwynion y tymor hwn. Glyn Ebwy fydd yr ymwelwyr cyntaf â’r maes hanesyddol ers iddo gael ei ail-ddatblygu, a hynny ddydd Sadwrn 10 Hydref ac mae Joe Thomas yn edrych ymlaen yn fawr at hynny:
“Mae hwn yn bendant yn gyfnod newydd i ni fel carfan. Mae’n bwysig ein bod yn anrhydeddu a chofleidio hanes ein clwb wrth i ni ddychwelyd i Sain Helen a’r ffordd orau o wneud hynny yw perfformio’n dda ar y maes.”
TRI CHYNNIG I GAERDYDD YN EU CANFED TYMOR A HANNER?
Mae Caerdydd wedi gorffen ar frig tabl tymor arferol Super Rygbi Cymru am ddwy flynedd yn olynol – cyn colli yn eu rownd gynderfynol ym Mharc yr Arfau ddwywaith a cholli’r cyfle i hawliod Tlws Super Rygbi Cymru ar eu tomen eu hunain.
Yn 2024/25, fe gollon nhw o 35-20 yn erbyn eu hen elynion Casnewydd ac yna, y tymor diwethaf, fe gawson nhw eu curo o 30-22 gan Lanymddyfri yn y pedwar olaf. Aeth y ddau dîm ymlaen i drechu Glyn Ebwy yn eu rowndiau terfynol ar Barc Eugene Cross.
Felly, ‘dyw hi’n ddim syndod bod capten Caerdydd, Craig Hudd, yn benderfynol o ennill Tlws Super Rygbi Cymru i goroni tymor pen-blwydd y clwb yn 150 oed:
“Ry’n ni wedi methu gwneud cyfiawnder â’n hunain yn y rowndiau cynderfynol am y ddwy flynedd ddiwethaf ac mae’n dal i frifo. Y llynedd, fe ddechreuon ni braidd yn araf ac ildio 14 pwynt yn gynnar yn erbyn tîm da o Lanymddyfri, ac mae hi bob amser yn eithaf anodd dod yn ôl o sefyllfa felly,” cyfaddefodd Hudd.
“Llwyddon ni i ddod yn gyfartal erbyn hanner amser, ond dydw i ddim yn credu ein bod ni wedi chwarae ein rygbi gorau yn yr ail hanner. Trodd y tywydd, ac fe fethon ni barhau gyda’r momentwn oedd ganddon ni cyn yr egwyl.
“Dwi ddim yn siwr os mai diffyg profiad, neu efallai ychydig o nerfau oedd yn gyfrifol am hynny – ond Llanymddyfri aeth â hi erbyn y chwiban olaf.
“Gan ei bod hi’n ben-blwydd arbennig iawn ar y clwb y tymor yma – gobeithio wir y gallwn ni fynd gam ymhellach ac ennill y gystadleuaeth y to yma.”