Bydd Super Rygbi Cymru yn cyflwyno’r cerdyn coch 20 munud o ddechrau tymor 2026/27 ymlaen.
Mae’r cerdyn 20 munud yn dangos gwahaniaeth rhwng chwarae peryglus anghyfreithlon a gweithredoedd bwriadol o drais neu ymddygiad treisgar.
O dan y system newydd, gall y dyfarnwr ddangos cerdyn coch 20 munud pan fydd trosedd yn cyrraedd y trothwy ar gyfer cerdyn coch, ond sydd ddim yn cael ei ystyried yn weithred fwriadol o drais neu ymddygiad treisgar.
Ni fydd y chwaraewr sydd wedi troseddu yn cymryd unrhyw ran pellach yn y gêm, tra bydd ei dîm yn chwarae gyda 14 chwaraewr am gyfnod o 20 munud.
Ar ôl i’r 20 munud hwnnw ddod i ben, bydd y tîm yn cael dod ag eilydd ymlaen yn lle’r chwaraewr sydd wedi’i ddanfon o’r maes – gan olygu eu bod yn dychwelyd at 15 o chwaraewr.
Bydd pob achos o gerdyn coch yn parhau i gael eu hystried yng nghyd-destun y broses ddisgyblu arferol.
Mae troseddau all arwain at gerdyn coch 20 munud yn cynnwys cyswllt uchel peryglus, rycio a chlirio sgarmesi’n beryglus, a thaclo sy’n cynnwys lefel uchel o berygl.
Cerdiau coch parhaol yn parhau
Bydd cerdiau coch parhaol yn parhau i gael eu rhoi am weithredoedd bwriadol o drais neu ymddygiad treisgar.
O dan yr amgylchiadau hynny, ni fydd y chwaraewr sydd wedi troseddu yn cymryd unrhyw ran pellach yn y gêm ac ni ellir dod ag eilydd ymlaen yn ei le, sy’n golygu y bydd ei dîm yn chwarae gyda 14 chwaraewr am weddill y gêm.
Gall dyrnu, taro, sathru a chyswllt â’r llygad neu ardal y llygad arwain at gerdyn coch parhaol.
Bydd y system newydd yn digwydd yng ngemau Super Rygbi Cymru 2026/27, a bydd canllawiau clir yn cael eu rhoi i glybiau a dyfarnwyr y gêm cyn dechrau’r gystadleuaeth.
Sut bydd dyfarnwyr yn dangos bod cerdyn coch 20 munud wedi ei roi?
Bydd y dyfarnwr yn arwyddo cerdyn coch 20 munud drwy groesi ei freichiau o flaen ei frest a dal y cerdyn coch uwch ei ben.
Mae cyflwyno’r cerdyn coch 20 munud yn rhan o ddatblygiad parhaus Super Rygbi Cymru a’i uchelgais i arddangos a gweithredu’r safonau a’r datblygiadau arloesol sy’n cael eu gweld yn y gêm broffesiynol.
Cysondeb Penderfyniadau Super Rygbi Cymru
Y dyfarnwr fydd yn penderfynu ar y gosb briodol, gyda chefnogaeth y cyd-swyddogion yn y gêm lle bo angen hynny.
Wrth ofalu am gemau Super Rygbi Cymru, bydd gan y dyfarnwyr dair cosb bosib ar gael iddyn nhw ar gyfer chwarae anghyfreithlon ar y cae:
- Cerdyn melyn
- Cerdyn coch 20 munud
- Cerdyn coch parhaol
Bydd hyn yn darparu fframwaith cyson yn y gystadleuaeth, gan gynnal gwahaniaeth clir rhwng chwarae anghyfreithlon peryglus neu ddi-hid a gweithredoedd bwriadol o drais.