Welsh Rugby Union - Grym y Boks yn boenus i Gymru

Daeth gemau Cymru yng Nghyfres Hydref Quilter i ben gyda record o golled o 73-0 yn erbyn De Affrica yng Nghaerdydd y prynhawn yma.

Grym blaenwyr y Springboks osododd y sylfaen gadarn i’r ymwelwyr hawlio eu pedwaredd buddugoliaeth o’r bron ar dir Cymru ac fe sgorion nhw 11 o geisiau o dan do Stadiwm Principality.

Roedd carfan Steve Tandy’n gwybod yn iawn bod her a hanner yn eu wynebu yn erbyn Pencampwyr y Byd – oedd eisoes wedi ennill 11 o gemau prawf yn ystod 2025.

Roedd carfan De Affrica ar gyfer yr ornest heddiw wedi ennill 899 o gapiau rhyngwladol o’u cymharu â 306 Cymru ac felly doedd hi’n ddim syndod iddyn nhw ddechrau’r gêm hon yn gryf gan sgorio tri chais yn ystod yr hanner awr agoriadol.

Yn dilyn cyfres o hyrddiadau corfforol gan bac y Boks, y prop pen rhydd Gerhard Steenkamp blymiodd am gais cyntaf yr ymwelwyr wedi 8 munud o chwarae. Llwyddodd cyn-fyfyriwr Coleg Llanymddyfri, Sacha Feinberg-Mngomezulu gyda’r trosiad o flaen y pyst.

Roedd sgrym De Affrica’n achosi problemau difrifol i wyth blaen Cymru’n gynnar, ac wrth i Luc Ramos chwarae mantais am ail drosedd o’r fath, llwyddodd yr asgellwr Ethan Hooker i hawlio ei ail gais rhyngwladol ef ac ail gais y Springboks o’r prynhawn. Troswyd y cais hwnnw hefyd gan Feinberg-Mngomezulu.

Fe ildiodd y Cymry saith cic gosb yn ystod yr hanner awr cyntaf ac fe ddangosodd blaenwyr De Affrica eu grym di-gyfaddawd unwaith yn rhagor wrth greu’r cyfle hawdd i’r wythwr Jasper Wiese fanteisio ar oruchafiaeth sgrym ei dîm. Yn dilyn trydydd trosiad Sacha Feinberg-Mngomezulu, roedd y fuddugoliaeth yn ddiogel i’r ymwelwyr i bob pwrpas ac roedd eu mantais yn 21 o bwyntiau.

Wedi iddynt reoli chwarae’r cyfnod cyntaf, De Affrica gafodd y gair olaf cyn troi hefyd. Wedi i’r tîm cartref idlio cic gosb bellach, fe redodd Andre Esterhuizen yn gryf, yn syth ac yn galed at linell gais Cymru, ac roedd y mewnwr Morne Van Den Berg yn ddigon effro i ddod o hyd i fwlch bychan i dirio pedwerydd cais ei dîm.

Parhau wnaeth record gicio berffaith Sacha Feinberg-Mngomezulu i roi mantais o 28 pwynt i Dde Affrica ar yr egwyl.

Hanner Amser: Cymru 0 De Affrica 28

Byddai’r Cymry wedi gobeithio am ddechreuad mwy cadarnhaol i’r ail gyfnod ond nid felly y bu hi o bellffordd gan i Dde Affrica ychwanegu pedwar cais arall at eu cyfrif yn ystod 14 munud cyntaf yr ail hanner.

Funud yn unig wedi troi bu’n rhaid i Aaron Wainwright adael y maes am gyfnod byr gydag anaf i’w lygad. Yn union wedi hynny fe diriodd y prop pen tynn Wilco Louw bumed cais ei dîm a danfonwyd Taine Plumtree i’r cell cosb am gamsefyll wrth geisio atal y sgôr.

Dri munud yn unig wedi hynny, fe ddawnsiodd Sacha Feinberg-Mngomezulu at gysgod pyst y Cymry i sgorio’i wythfed cais rhyngwladol – a do fe drosodd ei gais ei hun.

Wedi 49 munud o chwarae fe fanteisiodd Canan Moodie ar bêl rydd i arddangos ei sgiliau pêl-droed. Seithfed cais y Springboks a seithfed trosiad Feinberg-Mngomezulu.

Yn union wedi hynny, fe ddaeth Rassie Erasmus â’i holl fainc i’r cae ar yr un pryd – a thro Wainwright oedd hi i dreulio 10 munud yn y cell callio am dacl anghyfreithlon yn ystod y symudiad arweiniodd at gais y canolwr cydnerth a Seren y Gêm, Andre Esterhuizen. Doedd y ffaith i Sacha Feinberg-Mngomezulu fethu â’r trosiad yn fawr o gysur i selogion Stadiwm Principality.

Fe wnaeth y maswr dawnus yn iawn am ei gam wedi 63 munud o chwarae wrth iddo hawlio’i ail gais o’r prynhawn.

Cyn yr ornest hon, dim ond Lloegr yn gynharach eleni, oedd wedi sgorio deg cais ar dir Cymru – ond fe efelychodd De Affrica y gamp honno pan groesodd y clo Ruan Nortje linell gais y Cymry wedi 68 munud o chwarae.

Roedd digon o amser i’r ymwelwyr rwbio halen pellach i friwiau’r Cymry a daeth yr eilydd Eben Etzebeth y degfed sgoriwr gwahanol i dirio ar achlysur ei 141fed ymddangosaid dros ei wlad.

Yn dilyn nawfed trosiad Sacha Feinberg-Mngomezulu o’r ornest, roedd ei gyfanswm personol yn 28 pwynt ac roedd De Affrica wedi ail-ysgrifennu’r llyfrau hanes yng Nghymru.

Y nifer fwyaf o geisiau i Gymru idlio ar eu tomen eu hunain, y gwahaniaeth pwyntiau mwyaf rhwng dau dîm yng Nghaerdydd ac roedd 28 pwynt Feinberg-Mngomezulu yn record i ymwelydd ar dir Cymru.

Dyma oedd y tro cyntaf i Gymru fethu â sgorio pwynt yng Nghaerdydd ers ymweliad Iwerddon ym 1967.

Yr unig wall ym mherfformiad De Affrica oedd y ffaith i Etzebeth weld cerdyn coch am wthio’i fawd i lygad Alex Mann yn y munudau olaf.

Er y bydd yr eilydd o brop Danny Southworth yn arbennig o falch o gynrychioli ei wlad am y tro cyntaf (Cap#1220), nid dyma’r canlyniad y byddai ef, na’i gyd-chwaraewyr wedi ei ddymuno.

Canlyniad: Cymru 0 De Affrica 73

Yn dilyn y gêm dywedodd Prif Hyfforddwr Cymru, Steve Tandy: “Er nad dyma’r canlyniad roedden ni’n chwilio amdano, alla’i ddim beirniadu ymdrech fy chwaraewyr. Wedi i Dde Affrica deimlo eu bod wedi ennill y gêm, roedden nhw’n ddigyfaddawd ac yn galed iawn i’w hatal.

“Mae’n rhaid i’n bechgyn ifanc ni ddysgu o’r profiadau yma ac er mwyn i hynny ddigwydd mae’n rhaid i ni chwarae gemau fel hyn.”

Ychwanegodd Capten Cymru, Dewi Lake: “Er mwyn gwella fel tîm mae’n rhaid i ni chwarae yn erbyn y timau gorau – ac fe ddangosodd De Affrica heddiw pam eu bod nhw’n Bencampwyr y Byd.

“Gawson ni ddim y bêl i ddangos beth ry’n ni’n gallu ei wneud wrth ymosod heddiw – ac er bod gan ein carfan lot fawr i ddysgu o’r gêm yma, fe fyddwn ni’n gweithio’n galed iawn er mwyn gwneud hynny.”

Dywedoodd Seren y Gêm Andre Esterhuizen: “Roedd hi’n fuddugoliaeth glir ond roedd hi’n gêm galed iawn. Dwi’n arbennig o hapus gyda fy mherfformiad heddiw ac mae derbyn gwobr Seren y Gêm yn brofiad braf iawn. Fe frwydrodd Cymru tan y diwedd ond roedden ni’n dda iawn heddiw ac fe gaethon ni ein haeddiant.”