Alex Cuthbert

Mae CV rhyngwladol disglair Cuthbert eisoes yn cynnwys ennill dwy Bencampwriaeth y Chwe Gwlad RBS, ennill Camp Lawn ac ennill un o gyfresi’r Llewod.

Daeth enw asgellwr Gleision Caerdydd yn adnabyddus ar gylchdaith Saith Bob Ochr y Byd yr IRB, pan chwaraeodd dros dîm Paul John yn ystod yr ymgyrchoedd yn 2009/10 a 2010/11.

Enillodd ei gap cyntaf dros Gymru yn ystod hydref 2011 yn erbyn Awstralia, ac aeth yn ei flaen i ddechrau ym mhob un o gemau Cymru ym Mhencampwriaeth y Chwe Gwlad RBS yn 2012.

Cafodd flas ar lwyddiant unwaith yn rhagor ym Mhencampwriaeth y Chwe Gwlad RBS y flwyddyn ganlynol, pan sgoriodd ddau gais yn erbyn Lloegr yn y gêm olaf i helpu tîm Cymru i amddiffyn ei deitl.
Yn nes ymlaen y flwyddyn honno aeth ar daith y Llewod i Awstralia, a helpodd y tîm i ennill cyfres y Llewod am y tro cyntaf ers 16 mlynedd.