Undeb Rygbi Cymru | Cymru a Rhanbarthau | Ffeithiau am Ddydd y Farn

Mae tri chwaraewr wedi goroesi o garfan gyntaf y Dreigiau ar Ddydd y Farn yn 2013 i chwarae’r tymor hwn – Dan Lydiate, Taulupe Faletau (Caerdydd) a Sam Parry (Gweilch).
Y mewnwr Jonathan Evans sgoriodd y pwyntiau cyntaf dros y Dreigiau ar Ddydd y Farn yn 2013. Fe sgoriodd wedi 36 munud o chwarae ond colli fu ei hanes o 28-20 i’r Scarlets yn y pendraw.
Elliot Dee sgoriodd y cais cyflymaf yn hanes Dydd y Farn y llynedd pan diriodd wedi dim ond tri munud yn y fuddugoliaeth dros y Scarlets

Clo Cymru, Matthew Screech yw’r unig chwaraewr o ranbarth y Dreigiau i sgorio dau gais mewn gêm ar Ddydd y Farn. Digwyddodd hynny yn y fuddugoliaeth o 34-32 dros y Scarlets yn 2019.
Josh Lewis sy’n dal y record am y nifer fwyaf o bwyntiau a sgoriwyd mewn gêm i’r Dreigiau ar Ddydd y Farn (17) yn 2019.
Angus O’Brien sydd wedi sgorio’r cyfanswm mwyaf o bwyntiau i’r Dreigiau ar Ddydd y Farn gyda 32.

SCARLETS AR DDYDD Y FARN – OEDDECH CHI’N GWYBOD . . . .

Daeth pwyntiau cyntaf yn hanes Dydd y Farn o gic Owen Williams dros y Scarlets yn y 19^eg munud o’r fuddugoliaeth o 28-20 dros y Dreigiau yn 2003.
Sgoriodd George North y cais cyntaf ar Ddydd y Farn yn y 26^ain munud yn yr un gêm.
Roedd naw chwaraewr o garfan y Scarlets o’r diwrnod hwnnw yn 2013 yn dal i chwarae’r tymor hwn – Jonathan Davies, Scott Williams (Scarlets), Liam Williams (Japan), George North, Owen Williams (Gweilch), Aled Davies (Saraseniaid), Rhodri Jones, Rhodri Williams (Dreigiau), Josh Turnbull (Caerdydd).

Mae’r Scarlets wedi sgorio mwy o geisiau nag unrhyw dîm arall ar Ddydd y Farn – 32. Mae hynny’n eu rhoi saith ar y blaen i’r Gweilch.
Yn 2022 sgoriodd y Scarlets chwe chais yn erbyn y Dreigiau – gan efelychu camp y Gweilch yn 2018. Fe sgorion nhw 41 pwynt y diwrnod hwnnw – sy’n parhau’n record yn ystod gemau Dydd y Farn.
Mae’r Scarlets wedi sgorio 245 o bwyntiau yn ystod eu 9 gornest ar Ddydd y Farn – sy’n well na’r rhanbarthau eraill ac sy’n cynnig cyfartaledd pwyntiau iddynt o 27.
Mae tri chwaraewr wedi sgorio dau gais i’r Scarlets ar Ddydd y Farn – George North 2013, Tadhg Beirne 2018 a Johnny McNichol 2019.
Mae 19 pwynt Steve Shingler yn y fuddugoliaeth dros y Dreigiau yn 2016 yn golygu mai ef yw’r sgoriwr pwyntiau uchaf i’r Scarlets mewn gêm ar Ddydd y Farn.

GWEILCH AR DDYDD Y FARN – WYDDOCH CHI . . . .

Chwaraewr presennol y Gweilch Owen Williams sgoriodd y pwyntiau cyntaf erioed ar Ddydd y Farn – ond i’r Scarlets yn erbyn y Dreigiau! Ciciodd y cyntaf o’i dair gic cosb a dau drosiad yn y 19^eg munud i lywio’r Scarlets i fuddugoliaeth o 28-20 dros ranbarth Gwent.
Y capten Justin Tipuric yw’r unig un sydd yn dal i chwarae o garfan wreiddiol y Gweilch o 2013, er bod yr eilydd o brop ar y pryd – Dmitri Arhip yn chwarae i’r Dreigiau erbyn hyn.

James King oedd sgoriwr y cais cyntaf i’r Gweilch, pan groesodd yn yr 20^fed munud yn Stadiwm Principality yn y fuddugoliaeth o 23-16 dros Gaerdydd.
Mae’r Gweilch wedi ennill chwech o’u naw gêm ar Ddydd y Farn – pump yn erbyn Caerdydd ac un yn erbyn y Dreigiau. Maen nhw wedi colli deirgwaith i Gaerdydd.
Y Gweilch oedd y tîm cyntaf i sgorio chwe chais mewn gêm ar Ddydd y Farn pan guron nhw Gaerdydd o 40-27 yn 2018. Efelychod y Scarlets y gamp honno yn 2020 yn eu buddugoliaeth o 41-20 yn erbyn y Dreigiau
Dan Biggar yw’r unig chwaraewr sydd wedi sgorio pob math posib o bwyntiau personol ar Ddydd y Farn pan hawliodd 21 pwynt yn y fuddugoliaeth o 26-23 dros Gaerdydd yn 2020. Sgoriodd gais, dau drosiad, pedair cic gosb ac enillodd y gêm gyda gôl adlam yn nhri munud olaf yr ornest.
21 pwynt Biggar yw’r sgôr uchaf mewn un gêm gan chwaraewr ar Ddydd y Farn sydd ddeubwynt yn fwy na chyfanswm Jason Tovey i Gaerdydd yn 2022 a Steve Shingler dros y Scarlets yn 2016.
Gareth Anscombe sy’n arwain y ffordd gyda’r cyfanswm mwyaf – gydag 86 – 77 i Gaerdydd a naw i’r Gweilch. Biggar yw’r ail gyda 70.

RYGBI CAERDYDD AR DDYDD Y FARN – WYDDOCH CHI . . .

Daeth y cais a’r pwyntiau cyntaf a sgoriwyd i Gaerdydd ar Ddydd y Farn gan Leigh Halfpenny yn ôl yn 2013.
Mae Halfpenny’n dal i chwarae (i’r Crusaders yn Seland Newydd), fel y mae ei gyd-chwaraewyr y diwrnod hwnnw Lloyd Williams (Ealing) a Lewis Jones (Dreigiau).
Yr wythnos nesaf fydd y 10^fed Dydd y Farn. Mae Caerdydd wedi cwrdd â’r Gweilch wyth o weithiau, ac mae’n 5-3 yn y gyfres i’r Gweilch.
Jason Tovey sy’n dal y record am sgorio’r nifer fwyaf o bwyntiau dros Gaerdydd mewn gêm ar Ddydd y Farn – 19 yn yr ornest y tu ôl i ddrysau caeedig ym Mharc yr Arfau yn 2020 yn y fuddugoliaeth o 29-20 dros y Gweilch.
Gareth Anscombe yw prif sgoriwr Caerdydd ar Ddydd y Farn – gyda chyfanswm o 77 pwynt mewn pum gêm. (3chais 13trosiad 12gôl gosb)