Bydd canolwr y Scarlets yn creu cyfuniad newydd yng nghanol cae gydag Owen Watkin wrth i Warren Gatland roi mwy o gyfrifoldeb i’r chwaraewyr ifanc yn y garfan.
Mae Roberts a Watkin yn cymryd lle George North a Nick Tompkins – dau aelod profiadol o’r garfan. Er eu siom, mae North a Tompkins wedi derbyn a deall penderfyniad y Prif Hyfforddwr i arbrofi gyda phartneriaeth newydd yng nghanol cae.
Dywedodd Mike Forshaw, Hyfforddwr Amddiffyn Cymru:“Mae hyn yn gyfle i ni gael cipolwg ar Joe Roberts, chwaraewr oedd yn anlwcus i beidio bod yn y garfan ar gyfer Cwpan y Byd. Ry’n ni wedi penderfynu rhoi Owen Watkin (37 cap) – sydd â digon o brofiad – gydag ef yn y canol.
“Ry’n ni’n credu mai hon yw’r gêm orau i weld sut mae’r bartneriaeth yma’n gweithio.
“Dyw George a Nick heb eu hanafu, ond ry’n ni wedi siarad gyda’r ddau a maen nhw’n deall y penderfyniad.
“Maen nhw wedi bod yn wych ac wedi bod yn rhoi cyngor gwerthfawr i’r ddau arall.”
Bydd Cymru yn anelu at ennill eu gêm gyntaf o’r Bencampwriaeth eleni ddydd Sul – a sicrhau eu buddugoliaeth gartref gyntaf yn y gystadleuaeth ers curo’r Alban yn 2022. Dyma fydd un o’r carfanau lleiaf profiadol y mae Warren Gatland wedi’i dewis erioed, ond mae’r tîm hyfforddi yn mynnu parhau rhoi cyfle i’r genhedlaeth nesaf.
Ychwanegodd Forhsaw, “Rwy’n deall fod y cefnogwyr eisiau ennill pob gêm – maen nhw’n Gymry balch. Dwi fel hyfforddwr eisiau yr un peth, dyna pam ry’n ni’n gweithio mor galed bob dydd.
“Ry’n ni’n ceisio adeiladu ar gyfer Cwpan y Byd, ac mae’n dewisiadau yn ystod y Chwe Gwlad yn mynd i fod yn help mawr wrth i ni benderfynu pwy fydd yn teithio i Awstralia dros yr haf. Ond yn y tymor byr rwy’n siwr y gallwn ennill y ddwy gêm nesaf a gorffen y Bencampwriaeth ar nodyn uchel.”
