Mae hi’n debygol mai Wainwright fydd yn cipio crys yr wythwr yn ei chweched ymgyrch Chwe Gwlad, ac mae’n awchu am y cyfle hwnnw unwaith eto.
“Heb os, mae’n well gen i chwarae yn safle’r wythwr.
“Mi alla’i chwarae rhif chwech wrth gwrs ond ‘rwy’n mwynhau cael y rhif wyth ar fy nghefn.”
Mae eisoes wedi ennill Camp Lawn, dwy Bencampwriaeth Chwe Gwlad, ac mae wedi chwarae yn nwy ymgyrch ddiwethaf Cymru yng Nghwpan y Byd hefyd. Hynny oll ar ôl dysgu ei grefft gyda’r Dreigiau, lle mae newydd arwyddo estyniad ar ei gytundeb.
Yn ogystal â bod yn un o hoelion wyth ei ranbarth, mae wedi tyfu i fod yn ffigwr dylanwadol a phoblogaidd yng ngharfan Warren Gatland hefyd.
Yn fachgen â’i draed ar y ddaear, fe gyfaddefodd Wainwright ei fod yn “falch” o gael ei ddewis eto ar gyfer ymgyrch arall gyffrous yng nghrys coch Cymru.
“Rwyf wedi gweithio’n galed dros y misoedd diwethaf ac roedd cael fy enwi yn y garfan eto yn fraint enfawr.
“Ry’n ni gyd yn gwthio ein gilydd yn ei sesiynau ymarfer, ac mae pawb wedi dysgu’n union beth sydd angen i ni ei wneud.
“Ry’n ni’n disgwyl gêm arbennig o galed gan flaenwyr Yr Alban ddydd Sadwrn, felly bydd yn rhaid i ni aros yn ddisgybledig trwy’r 80 munud er mwyn sicrhau buddugoliaeth – a dyna’n union beth ry’n ni’n bwriadu ei wneud.”
