Bu Howley’n aelod allweddol o staff Warren Gatland fel ei Hyfforddwr Cynorthwyol o’r blaen wrth gwrs -ac yn ystod y cyfnod hwnnw enillwyd y Bencampwriaeth yn 2013, cipiwyd tair Camp Lawn (2008 a 2012, 2019) ac fe gyrhaeddodd y tîm rownd gynderfynol Cwpan Rygbi’r Byd yn 2011.
Bydd Howley yn ail-ymuno â thîm hyfforddi Gatland fel Hyfforddwr Cynorthwyol (technegol), a bydd yn cydweithio â Mike Forshaw (amddiffyn), Jonathan Humphreys (blaenwyr), Neil Jenkins (sgiliau) ac Alex King (ymosod).
Yn ei rôl newydd, bydd gan Howley gyfrifoldeb arbennig hefyd am lwybr datblygu y dynion a’r bechgyn. Bydd yn cydweithio’n agos gyda Phrif Hyfforddwr newydd y tîm o dan 20 – sef Richard Whiffin.
Bydd Howley yn ymuno â Whiffin mewn gwersyll ymarfer yn yr Alban yr wythnos nesaf ac ar gyfer gemau paratoadol yn y flwyddyn newydd i baratoi ar gyfer cystadleuaeth y Chwe Gwlad o dan 20.
Mae Warren Gatland wrth ei fodd bod Howley’n dychwelyd i’r gorlan genedlaethol gyda Chymru wedi ei gyfnod gyda Chanada. Yn ogystal â’r profiad o gydweithio gyda Chymru am gyfnod sylweddol, bu Howley’n aelod gwerthfawr o dîm hyfforddi Gatland ar dair taith y Llewod (2009, 2013, 2017) hefyd. Felly wrth i Warren Gatland orfod ffarwelio â’i Hyfforddwr yr ardal y dacl a gwrthdaro – Jonathan Thomas, mae’n croesawy wyneb cyfarwydd iawn yn ôl i’w dîm hyfforddi.
Dywedodd Warren Gatland:”Rob yw un o’r hyfforddwyr Cymreig mwyaf llwyddiannus a phrofiadol ar y llwyfan rhyngwladol ar hyn o bryd.
Pan gollon ni Rob o rygbi Cymru, fe gollon ni lawer iawn o ddeallusrwydd a gwybodaeth am y gêm yng Nghymru a’r sîn ryngwladol.’Rwy’n falch iawn o’i groesawu yn ôl i’r rôl newydd hon.
“Bydd y ffaith y bydd yn gallu dylanwadu ar y llwybrau datblygu mewn modd strategol yn fuddiol i bob rhan o’r gêm, gan gynnwys y tîm o dan 20, y brif garfan, yn ogystal â’n rhanbarthau a’u hacademïau hefyd. O safbwynt y brif garfan, ry’n ni wrth ein bodd y bydd yn ymuno gyda ni – ac mae’n dipyn o gamp bod Rygbi Cymru wedi llwyddo i sicrhau ei wasanaeth a’i ddoniau sylweddol unwaith eto.”
Yn dilyn ei gyfnod diwethaf gyda charfan Cymru, daeth Howley’n uwch hyfforddwr cynorthwyol gyda Rygbi Canada yn 2020 – ond ‘roedd yr ysfa i ddychwelyd i’r gorlan Gymreig yn gryf i gyn-gapten Cymru sydd hefyd wedi profi ei hun yn un o hyfforddwyr mwyaf llwyddiannus rygbi Cymru.
Dywedodd Rob Holwey:”Rwy’n teimlo mai dyma’r amser iawn i mi ddod yn ôl ac rwy’n edrych ymlaen yn fawr at ddychwelyd i’r gorlan gyda Chymru. Mae gen i ail gyfle i wneud swydd sydd mor bwysig i mi ac rwy’n ddiolchgar i bawb yn Rygbi Cymru am osod eu ffydd ynof fi. ‘Rwy’n bwriadu ad-dalu’r ffydd hwnnw hyd eithaf fy ngallu.
“Mae’r cyfle i weithio gyda’r timau o dan 20 a’r timau iau eraill – a’u helpu i ddatblygu yn arbennig o gyffrous. ‘Rwy’n credu y gallaf eu paratoi ar gyfer heriau rygbi rhyngwladol.’Rwyf wedi bod trwy gyfnod hynod heriol yn fy mywyd, ond mae siarad yn agored am fy sefyllfa wedi fy ngalluogi i symud ymlaen. ‘Rwy’n fwy na pharod i rannu fy mhrofiad gydag eraill a allai fod yn profi cyfnodau anodd ac rwy’n ddiolchgar i bawb o’m cwmpas sydd wedi fy nghefnogi trwy’r amseroedd anodd hyn.
“Mae Richard Whiffin yn hyfforddwr ifanc talentog iawn ac mae gennym grŵp gwych o chwaraewyr o dan 20 hefyd. Mae’r dyfodol yn edrych yn gadarnhaol iawn yng Nghymru er gwaethaf yr heriau ariannol amlwg sy’n wynebu’r byd ar hyn o bryd.”
Mae Whiffin hefyd yn dychwelyd i Gymru gan iddo weithio gyda thîm Menywod Cymru fel hyfforddwr ymosod yn ystod Cwpan y Byd 2022 yn Seland Newydd.
Cyn hynny roedd wedi treulio dwy flynedd fel hyfforddwr ymosod y Scarlets.
Bu’n gyfarwyddwr academi clwb Caerloyw cyn iddo gynorthwyo ymgyrch yr Highlanders yn y Super Rugby Pacifica y llynedd.
Dychwelodd i Gymru i gymryd yr awennau dros dro gyda thîm Colegau Caerdydd a’r Fro – enillodd Bencampwriaeth yr Ysgolion a’r Colegau y tymor diwethaf.
Dywedodd Richard Whiffin: “Mae gallu gweithio gyda hyfforddwr o statws Rob a chael cysylltiad clir gyda’r garfan genedlaethol yn gyffrous i mi’n bersonol ac i’r garfan o dan 20 hefyd. Bydd y cydweithio strategol hwn o fudd i bawb o’r academïau rhanbarthol i’r garfan genedlaethol ac rwy’n edrych ymlaen yn fawr at ddechrau yn y rôl newydd.”
Mae Whiffin, sydd hefyd yn gyn-hyfforddwr ymosod gyda charfan o dan 20 Lloegr a’r Gwyddelod yn Llundain yn ymuno â Howley i ddechrau ar eu gwaith ar unwaith.
