Mae breuddwyd Dewi Lake o arwain Cymru yng Nghwpan y Byd yn y fantol, wedi iddo anafu ei ben-glin yn y golled o 19-17 yn Twickenham ddydd Sadwrn.
Dim ond am 27 munud y llwyddodd i aros ar y maes cyn i Owen Farrell ddisgyn arno mewn ryc.
Bydd anaf Lake, sy’n 24 oed, yn cael ei asesu yfory (Mawrth) a gallai canlyniadau’r sgan benderfynu os y bydd Lake yn cael ei gynnwys yn y garfan derfynol o 33 – fydd yn cael ei chyhoeddi wythnos i ddydd Llun.
Anaf i’w ysgwydd sy’n poeni Taine Plumtree a bydd ei dynged ef hefyd o bosib yn cael ei benderfynu yfory.
Mae’r newyddion am ysgwydd Taine Basham yn fwy calonogol ac mae hyfforddwr olwyr Cymru, Alex King wedi cadarnhau na ddioddefodd yr wythwr gyfergyd yn y digwyddiad welodd Owen Farrell yn derbyn cerdyn coch am ei dacl anghyfrifol.
Mae’n bosibl y bydd Basham, yn gallu cael ei ystyried i wynebu Pencampwyr y Byd, De Affrica yn Stadiwm Principality brynhawn Sadwrn yng ngêm olaf Cyfres Haf Vodafone.
Mae hefyd yn bosib y bydd asgellwr Cymru a’r Llewod, Alex Cuthbert a’r canolwr cydnerth Johnny Williams o dan ystyriaeth i wynebu y Springboks – cyn i Gymru wynebu Fiji yng ngêm agoriadol Cymru yng Nghwpan y Byd ym Mordeaux ar y 10fed o Fedi. Dywedodd King:
“Mae Cuthy a Jonny yn ôl yn ymarfer sy’n amlwg yn cryfhau dyfnder y garfan. Mae wedi bod yn wych gweld mwyafrif llethol y chwaraewyr yn cael cyfle i chwarae yn ystod y gemau diweddar.
“Bydd De Affrica yn cynnig tipyn o her i ni gan eu bod newydd guro Ariannin ddwywaith ac wedi curo Awstralia yn ddiweddar. Fe enillon nhw yn Twickenham yr Hydref diwethaf hefyd.”