Y Dreigiau sgoriodd unig gais y gêm, sef cais i’r asgellwr Will Harries yn yr hanner cyntaf, ond rhoddodd grym blaenwyr y Gleision y cyfle i Leigh Halfpenny gicio’r pwyntiau yn yr ail hanner gan sicrhau buddugoliaeth i’r tîm cartref.
Mae’r canlyniad yn golygu bod y Gleision yn dringo o’r degfed i’r nawfed safle yn y tabl, ac mae’r Dreigiau’n parhau’n chweched ar ôl iddynt fethu â sicrhau pwynt bonws am golli, diolch i droed Halfpenny.
Prin oedd y cyfleoedd i sgorio ceisiau mewn gornest a oedd yn brawf ar ddycnwch y chwaraewyr. Llwyddodd y Gleision i dawelu bygythiad ymosodol Toby Faletau, na welwyd llawer ohono drwy’r gêm, ond roedd gêm gicio wych Dan Evans a Jason Tovey yn golygu bod gobaith i’r Dreigiau o hyd.
Erbyn i’r Gleision fynd 9-0 ar y blaen diolch i droed Halfpenny roedd pethau’n edrych yn ddu ar y Dreigiau, ond llwyddodd yr ymwelwyr i syfrdanu’r Gleision gyda chais gwych ar ôl i Ashley Smith wrthymosod o hanner ffordd.
Gyda’r sgôr yn 10-9 o blaid y Dreigiau ar yr hanner, cawsant dri phwynt arall diolch i gic gan Tovey wrth iddi ddechrau arllwys y glaw.
Cafodd Faletau ei gosbi yn y llinell, a gyda’i drydedd gic lwyddiannus o’r prynhawn llwyddodd Halfpenny i leihau’r bwlch i un pwynt unwaith eto.
Cafodd Smith ei gosbi am beidio â rholio i ffwrdd o’r ryc, ac roedd y gôl gosb gan Halfpenny yn golygu bod y Gleision ar y blaen gyda sgôr o 15-13. Yna, cafodd Halfpenny gyfle i roi rhywfaint o olau dydd rhwng ei dîm a’r Dreigiau, ond rhuthrodd ei ergyd ac aeth y bêl heibio i’r postyn.
Yna, penderfynodd Gareth Davies gymryd yr awenau gan gicio gôl adlam, a sicrhaodd Halfpenny y fuddugoliaeth gyda’i chweched gôl gosb lwyddiannus o’r prynhawn, wedi i Faletau gael ei gosbi, braidd yn llym, am daro’r bêl o afael mewnwr y Gleision, Lloyd Williams
